Bréf til Viðskiptaráðherra varðandi séreignasparnað

Ég sendi þetta bréf á aðstoðarmann viðskiptaráðherra í dag- ekki gott að sitja með hendur í skauti þegar svona mál eru annars vegar:

Sæl Helga,
mig langar að koma með eftirfarandi fyrirspurn til viðskiptaráðherra;
Samkvæmt yfirlýsingu viðskiptaráðherra kom fram þegar SPRON fór á hausinn, að innistæður væru að fullu tryggðar. Þá á við innistæður á sparireikningum en ekki sjóðum eins og kom skýrlega fram í október þegar hinir bankarnir fóru á hliðina.
Mjög fáir viðskiptavinir í gamla SPRON voru með séreignasparnað sinn á verðtryggðum bókum þar sem flestir skráðu sig í æviskeið. Aldurshópurinn 18-40 ára hefur nú þegar tapað miklu af séreignasparnaðinum sínum (ca helming).
 Mun núverandi innistæða séreignasparnaðar vera tryggð líka, eða er sá peningur bara gufaður upp?
Þegar ríkið gerir að lögum að vinnuveitendum sé skylt að greiða 2% mótframlag í séreignasparnað og ýtir þess vegna undir að fólk nýti sér það, ætti séreignasparnaðurinn þá ekki að vera tryggður eins og innistæður?
 
Ég vona að þetta mál verði skoðað, því þetta er mér mjög hugleikið.
Bestu kveðjur,
Inga Jessen

Ef ég fæ svar, mun ég birta það á síðunni.

Athugasemdir

[Gunnlaugur Ingvarsson (IP-tala skráð) 2.4.2009 kl. 08:28]

Sæl Inga.

Gott hjá þér að spyrja ráðamenn útúr með þetta.

En í mínum huga átti aldrei að leyfa það að ævisparnaður eins og lífeyrissparnaður væri í öðru en örggri ávöxtun. Það er í verðtryggðri ávöxtun eða þaðan af tryggara.

Eins finnst mér fáránlegt að fólk skuli bera af þessu fullan tekjuskatt, þó svo að tekjuskattur hafi ekki verið tekinn af þeirri upphæð sem reglulega var dreginn af upphæðinni og fór í sparnaðinn. Verður fólk þá sem hefur tapað kanski helmingnum af viðbótarlífeyris sparnaðar inneign sinni rukkað að fullu um tekjuskatt líka af þeirr upphæð sem tapaðist, það væri alveg eftir ruglinu.

Einnig finnst mér bara yfirleitt mjög absúrd að rukka fullan tekjuskatt af þessum sparnaði, þetta rökstyð ég með því að til lengri tíma litið ætti meginhluti sparnaðarins að vera vextir og því fjármagnstekjur.

En skattaprósenta tekjuskatts er u.þ.b. 35% á meðan skattprósenta fjármagnstekna er aðeins 10%.

Hví skyldu óbreyttir launþegar ekki njóta þess að spara og borga lægri skatta, físt að fjármagnseigendur sem eiga/áttu fúlgur fjár voru aðeins látnir greiða 10% af ávöxtun síns fjár.

Þetta er mikil mismunun og efast um að hún standist stjórnarskrá Íslenska lýðveldisins.

Athugaðu þetta endilega líka.

[Inga, 2.4.2009 kl. 11:29]

Sæll Gunnlaugur,

þetta er mjög góð athugasemd og hárrétt hjá þér. Ríkisstjórnin hefði átt að breyta löggjöf varðandi séreignasparnað og leyfa fólki að greiða 10% í fjármagnstekjuskatt- það hefði í rauninni átt að vera þannig í upphafi.

Ég skal skoða þetta.

[íris (IP-tala skráð) 2.4.2009 kl. 12:24]

Þú getur tekið út sparnaðinn þinn, allavega hringdi ég í morgun og það var ekkert mál, bara að útfylla eyðublöð.

[Inga, 2.4.2009 kl. 14:01]

Ég tók þetta af heimasíðu SPRON; það er hægt að sækja um greiðslu séreignasparnaðar en skv. eftirfarandi texta er sjóðurinn ennþá lokaður; 

 Hvar get ég fengið uppgefna stöðu yfir séreignarsparnaðinn minn hjá SPRON?

Þú getur nálgast stöðu séreignasparnaðar þíns í heimabanka SPRON.  Síðasta staða er frá 18. mars. Staðan uppfærist aftur við opnun sjóðanna.

Hvernig verður fyrirframgreiðslu vegna séreignarsparnaðar háttað sem átti að hefjast í apríl?

Fyrirframgreiðsla séreignasparnaðar SPRON lífeyris hefst 20. apríl eins og áður var tilgreint.  Móttaka á umsóknum um útgreiðslu lífeyrissparnaðar SPRON  er hjá SPRON Verðbréfum, Vegmúla 2. Umsóknir vegna greiðslu 20. apríl þurfa að berast í síðasta lagi 5. apríl.

[Sigrún Aðalsteinsdóttir, 3.4.2009 kl. 20:37]

Að sjálfsögðu þarf að komast að raunhæfri niðurstöðu um skattlagningu séreignarsparnaðar.  Ég er sammála því að stór hluti þess sparnaðar er fjármagnstekjur og því súrt í broti að þurfa að borga fullan tekjuskatt af því og því væri eðlilegt að færa skattaprósentuna af séreignasparnaði niður í 10%., einnig mætti fara e.k. millileið á t.d.15-17%, þar sem hluti séreignasparnaðar fellur beint undir tekjuskatt.

Hitt er svo annað mál að ég er mjög ósammála því að fólki væri gefinn kostur á því að taka út séreignasparnaðinn, það þýðir bara að fólkið í landinu borgar fyrir fjárglæframennina sem settu okkur á hausinn og situr svo eftir með sárt ennið þegar að ævikvöldinu kemur.

Þegar þetta kom til tals, sagði ég að nú mætti búast við auknum auglýsingum frá ferðaskrifstofum og fleiri aðilum sem vildu seilast í séreignasparnaðinn.  Og viti menn, þetta hefur komið á daginn.  Flestir Íslendingar eru bara þannig innréttaðir að ef þeir sjá einhversstaðar von um aukakrónur eyða þeir þeim í að njóta lífsins.  Fæstir líta á það sem lífsnautnir að greiða niður skuldirnar.  Að sjálfsögðu áttu að vera skilyrði fyrir úttekt sparnaðains, þ.e. hann ætti að greiða inn á lán.